ਥਾਣਾ ਮੂਲੇਪੁਰ ਦੀ ਪੁਲਿਸ ਨੇ ਪਿੰਡ ਰਿਊਣਾ ਉਚਾ ਦੀ ਹੱਦ ‘ਤੇ ਲਗਾਏ ਨਾਕੇ ਦੌਰਾਨ ਕਾਬੂ ਕੀਤੇ ਕਥਿਤ ਦੋਸ਼ੀ
ਮੰਡੀ ਗੋਬਿੰਦਗੜ੍ਹ, 1 ਮਾਰਚ (ਮਨੋਜ ਭੱਲਾ)- ਜ਼ਿਲ੍ਹਾ ਪੁਲਿਸ ਵੱਲੋਂ ਨਸ਼ਿਆਂ ਵਿਰੁੱਧ ਵਿੱਢੀ ਗਈ ਮੁਹਿੰਮ ਨੂੰ ਉਸ ਸਮੇਂ ਸਫਲਤਾ ਹਾਸਲ ਹੋਈ ਜਦੋਂ ਥਾਣਾ ਮੂਲੇਪੁਰ ਦੀ ਪੁਲਿਸ ਨੇ 19ਕਿਲੋ ਗਾਂਜੇ ਸਮੇਤ ਦੋ ਕਥਿਤ ਦੋਸ਼ੀਆਂ ਨੂੰ ਕਾਬੂ ਕੀਤਾ। ਇਹ ਜਾਣਕਾਰੀ ਦਿੰਦਿਆਂ ਐਸ਼.ਪੀ.(ਜਾਂਚ) ਸ਼.ਹਰਪਾਲ ਸਿੰਘ ਨੇ ਦੱਸਿਆ ਕਿ ਡੀ.ਐਸ਼.ਪੀ.ਫ਼ਤਹਿਗੜ੍ਹ ਸਾਹਿਬ ਸ਼ ਰਮਿੰਦਰ ਸਿੰਘ ਕਾਹਲੋਂ ਦੀ ਹਦਾਇਤਾਂ ਤੇ ਇੰਸਪੈਕਟਰ ਜਾਨਪਾਲ ਸਿੰਘ ਹੰਝਰਾ ਮੁੱਖ ਥਾਣਾ ਅਫਸਰ ਮੂਲੇਪੁਰ ਦੀ ਅਗਵਾਈ ਹੇਠ ਥਾਣਾ ਮੂਲੇਪੁਰ ਦੇ ਏ.ਐਸ਼.ਆਈ.ਬੂਟਾ ਸਿੰਘ ਨੇ ਸਮੇਤ ਪੁਲਿਸ ਪਾਰਟੀ ਰਾਜਪੁਰਾ-ਸਰਹਿੰਦ ਹਾਈਵੇ ਦੀ ਸਰਵਿਸ ਰੋਡ ਪਿੰਡ ਰਿਊਣਾ ਉਚਾ ਦੀ ਹੱਦ ਤੇ ਨਾਕਾਬੰਦੀ ਕੀਤੀ ਹੋਈ ਸੀ ਤਾਂ ਰਾਜਪੁਰਾ ਸਾਈਡ ਤੋਂ ਦੋ ਵਿਅਕਤੀ ਆਪਣੇ ਸਿਰਾਂ ਤੇ ਵਜਨਦਾਰ ਪਲਾਸਟਿਕ ਦੇ ਥੈਲੇ ਰੱਖ ਕੇ ਆ ਰਹੇ ਸਨ ਅਤੇ ਪੁਲਿਸ ਪਾਰਟੀ ਨੂੰ ਵੇਖ ਕੇ ਉਹ ਇਕ-ਦਮ ਪਿਛੇ ਨੂੰ ਮੁੜਨ ਲੱਗੇ ਤਾਂ ਏ.ਐਸ਼.ਆਈ.ਬੂਟਾ ਸਿੰਘ ਨੇ ਇਨ੍ਹਾਂ ਦੋਵੇਂ ਕਥਿਤ ਦੋਸ਼ੀਆਂ ਨੂੰ ਪੁਲਿਸ ਪਾਰਟੀ ਦੀ ਸਹਾਇਤਾ ਨਾਲ ਕਾਬੂ ਕੀਤਾ ।ਐਸ਼.ਪੀ.ਹਰਪਾਲ ਸਿੰਘ ਨੇ ਦੱਸਿਆ ਕਿ ਜਦੋਂ ਪੁਲਿਸ ਪਾਰਟੀ ਨੇ ਕਥਿਤ ਦੋਸ਼ੀਆਂ ਦੇ ਨੂੰ ਥੈਲਿਆਂ ਨੂੰ ਚੈਕ ਕੀਤਾ ਤਾਂ ਉਨ੍ਹਾਂ ਵਿੱਚੋਂ 19 ਕਿਲੋ ਗਾਂਜਾ ਬਰਾਮਦ ਹੋਇਆ। ਉਨ੍ਹਾਂ ਦੱਸਿਆ ਕਿ ਕਥਿਤ ਦੋਸ਼ੀ ਅਰਵਿੰਦ ਮਹਤੋ ਪੁੱਤਰ ਬਿਮਲ ਮਹਤੋ ਵਾਸੀ ਪਿੰਡ ਚਾਂਦਪੁਰ ਥਾਣਾ ਰਾਘੋਪੁਰ ਜ਼ਿਲ੍ਹਾ ਵਿਸ਼ਾਲੀ ਬਿਹਾਰ ਦੇ ਕਬਜੇ ਵਿੱਚੋਂ 10ਕਿਲੋ ਗਾਂਜਾ ਅਤੇ ਦੂਜੇ ਕਥਿਤ ਦੋਸ਼ੀ ਮੋਤੀ ਮਹਤੋ ਪੁੱਤਰ ਦਿਨੇਸ਼ ਮਹਤੋ ਦੇ ਕਬਜ਼ੇ ਵਿੱਚੋਂ 9 ਕਿੱਲੋ ਗਾਂਜਾ ਬਰਾਮਦ ਹੋਇਆ। ਉਨ੍ਹਾਂ ਅੱਗੇ ਦੱਸਿਆ ਕਿ ਏ.ਐਸ਼.ਆਈ.ਸੁਖਵਿੰਦਰ ਸਿੰਘ ਨੇ ਇਨ੍ਹਾਂ ਦੋਵੇਂ ਕਥਿਤ ਦੋਸ਼ੀਆਂ ਵਿਰੁੱਧ ਥਾਣਾ ਮੂਲੇਪੁਰ ਵਿਖੇ ਐਨ.ਡੀ.ਪੀ.ਐਸ਼.ਐਕਟ ਦੀ ਧਾਰਾ 20/61/85 ਅਧੀਨ ਮੁਕੱਦਮਾ ਦਰਜ਼ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਦੋਵੇਂ ਕਥਿਤ ਦੋਸ਼ੀਆਂ ਨੂੰ ਮਾਣਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।
