ਤਲਵੰਡੀ ਸਾਬੋ, 30 ਜੂਨ (ਰਾਮ ਰੇਸ਼ਮ ਨਥੇਹਾ)-ਜੂਨ ਮਹੀਨੇ ਦੇ ਆਖਰੀ ਦਿਨ ਨੂੰ ਆਈ ਬਾਰਿਸ਼ ਨੇ ਜਿੱਥੇ ਪਿੰਡਾਂ ਦੇ ਲੋਕਾਂ ਨੂੰ ਵੱਡੀ ਰਾਹਤ ਦਿੱਤੀ ਹੈ ਉਥੇ ਸਥਾਨਕ ਸ਼ਹਿਰ ਵਾਸੀਆਂ ਲਈ ਇਹ ਬਾਰਿਸ਼ ਮੁਸੀਬਤ ਬਣੀ ਰਹੀ। ਤਲਵੰਡੀ ਸਾਬੋ ‘ਚ ਇੱਕ ਘੰਟਾ ਜੰਮ ਕੇ ਹੋਈ ਬਾਰਿਸ਼ ਦੌਰਾਨ ਸ਼ਹਿਰ ਦੀਆਂ ਗਲੀਆਂ ਅਤੇ ਬਾਜ਼ਾਰ ਸਮੁੰਦਰ ਦਾ ਰੂਪ ਧਾਰਨ ਕਰ ਗਏ। ਭਾਵੇਂ ਕਿ ਸੀਵਰੇਜ ਵਿਭਾਗ ਦੀ ਚੌਕਸੀ ਅਤੇ ਵਧੀਆ ਕਾਰਗੁਜ਼ਾਰੀ ਕਾਰਨ ਬਰਸਾਤ ਬੰਦ ਹੋਣ ਤੋਂ ਇੱਕ ਘੰਟੇ ਦੇ ਅੰਦਰ ਅੰਦਰ ਗਲੀਆਂ-ਬਾਜ਼ਾਰਾਂ ਦਾ ਸਾਰਾ ਪਾਣੀ ਸੀਵਰੇਜ ਰਾਹੀਂ ਖਤਮ ਕਰ ਦਿੱਤਾ ਗਿਆ ਪ੍ਰੰਤੂ ਇੱਕ ਵਾਰ ਤਲਵੰਡੀ ਸਾਬੋ ਦਾ ਨਕਸ਼ਾ ਹੜ੍ਹਾਂ ਵਰਗਾ ਹੋ ਗਿਆ ਸੀ। ਸਵੇਰ ਤੋਂ ਹੀ ਪੈ ਰਹੀ ਬਾਰਿਸ਼ ਦੌਰਾਨ ਕਰੀਬ ਇੱਕ ਘੰਟਾ ਐਨੀ ਤੇਜ਼ ਬਾਰਿਸ਼ ਹੋਈ ਕਿ ਸਹਿਰ ਦੀਆਂ ਸਾਰੀਆਂ ਗਲੀਆ ਜਲ-ਥਲ ਹੋ ਗਈਆਂ ਇੱਕ ਵਾਰ ਲੋਕਾਂ ਦਾ ਆਉਣਾ ਜਾਣਾ ਬੇਹੱਦ ਮੁਸ਼ਿਕੁਲ ਹੋ ਗਿਆ। ਜਿਆਦਾ ਪਾਣੀ ਹੋਣ ਕਾਰਨ ਮੋਟਰਸਾਈਕਲ ਸਵਾਰ ਪਾਣੀ ਅੰਦਰ ਬੰਦ ਹੋਏ ਮੋਟਰਸਾਈਕਲ ਨੂੰ ਖਿਚਦੇ ਹੋਏ ਸੀਵਰੇਜ ਵਿਭਾਗ ਨੂੰ ਕੋਸਦੇ ਨਜ਼ਰ ਆਏ। ਉਧਰ ਤਲਵੰਡੀ ਸਾਬੋ ਦੇ ਮਾਈਸਰ ਮਹੱਲਾ ਦੇ ਵਾਰਡ ਨੰਬਰ 4 ਅੰਦਰ ਸੀਵਰੇਜ ਬੰਦ ਹੋਣ ਕਾਰਨ ਨੀਵੇ ਘਰਾਂ ਵਿੱਚ ਪਾਣੀ ਦਾਖਲ ਹੋਣ ਬਾਰੇ ਵੀ ਪਤਾ ਲੱਗਾ ਹੈ ਜਿਸ ਨੂੰ ਲੋਕ ਬਾਹਰ ਕੱਢ ਰਹੇ ਹਨ। ਉਕਤ ਵਾਰਡ ਦੇ ਵਾਸ਼ਿੰਦਿਆਂ ਨਾਇਬ ਸਿੰਘ, ਭੂਰਾ ਸਿੰਘ, ਟਿੱਕਾ ਸਿੰਘ, ਗੁਰਬਚਨ ਸਿੰਘ, ਸੁਰਜੀਤ ਸਿੰਘ ਤੇ ਮਹਿੰਦਰ ਸਿੰਘ ਨੇ ਦੁੱਖ ਦਸਦਿਆਂ ਕਿਹਾ ਕਿ ਜਦੋਂ ਵੀ ਬਾਰਿਸ਼ ਆਉਂਦੀ ਹੈ ਤਾਂ ਹਰ ਵਾਰੀ ਇਸ ਮੁਹੱਲੇ ਦਾ ਇਹੀ ਹਾਲ ਹੁੰਦਾ ਹੈ ਅਤੇ ਦਸ-ਦਸ ਦਿਨ ਪਾਣੀ ਖੜ੍ਹਾ ਰਹਿੰਦਾ ਹੈ। ਮੁਹੱਲਾ ਵਾਸੀਆਂ ਨੇ ਮੁਹੱਲੇ ਦੇ ਐਮ ਸੀ ਡਾ. ਘਈ ਨੂੰ ਮੌਕੇ ‘ਤੇ ਬੁਲਾ ਕੇ ਇਹ ਹਾਲ ਦਿਖਾਇਆ ਜਿੰਨ੍ਹਾਂ ਨੇ ਵਿਸ਼ਵਾਸ ਦੁਆਇਆ ਕਿ ਜਲਦੀ ਹੀ ਇਹ ਸਮੱਸਿਆ ਦਾ ਪੱਕਾ ਹੱਲ ਕਰਰਵਾਇਆ ਜਾਵੇਗਾ।
