Skip to content
Independent perspectives. Global stories.
BREAKING

ਮੁੱਖ ਮੰਤਰੀ ਮੁੰਬਈ ਵਿਖੇ ਅੰਬਾਨੀ ਭਰਾ, ਗੋਇਨਕਾ, ਮਹਿੰਦਰਾ, ਹਿੰਦੂਜਾ ਸਮੇਤ ਦੇਸ਼ ਦੇ ਉੱਚ ਸਨਅਤੀ ਘਰਾਣਿਆਂ ਨੂੰ ਮਿਲਣਗੇ

Share this story

image ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ’ਚ ਉਚ ਪੱਧਰੀ ਵਫ਼ਦ ਅੱਜ ਤੋਂ ਤਿੰਨ ਰੋਜ਼ਾ ਦੌਰੇ ’ਤੇ
ਚੰਡੀਗੜ੍ਹ, 9 ਅਪਰੈਲ- ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਸੋਮਵਾਰ ਤੋਂ ‘ਨਿਵੇਸ਼ ਪੰਜਾਬ‘ ਉਪਰਾਲੇ ਦੀ ਲੜੀ ਤਹਿਤ ਮੁੰਬਈ ਦੇ ਤਿੰਨ ਰੋਜ਼ਾ ਦੌਰੇ ਦਾ ਆਗਾਜ਼ ਕਰਨਗੇ ਜਿੱਥੇ ਉਹ ਦੇਸ਼ ਦੇ ਪ੍ਰਮੁੱਖ ਕਾਰੋਬਾਰੀਆਂ ਨੂੰ ਮਿਲਣਗੇ।
ਮੁੱਖ ਮੰਤਰੀ ਨਾਲ ਪੰਜਾਬ ਸਰਕਾਰ ਦਾ ਇਕ ਉਚ ਪੱਧਰੀ ਵਫ਼ਦ ਇਨ੍ਹਾਂ ਸਨਅਤਕਾਰਾਂ ਨੂੰ ਮਿਲੇਗੀ ਜਿਸ ਦੀ ਸ਼ੁਰੂਆਤ ਸੋਮਵਾਰ ਸ਼ਾਮ ਨੂੰ ਟਾਟਾ ਸੰਨਜ਼ ਦੇ ਮੁਖੀ ਸ੍ਰੀ ਨਟਰਾਜਨ ਚੰਦਰਸ਼ੇਖਰਨ ਦੇ ਨਾਲ ਮੀਟਿੰਗ ਤੋਂ ਹੋਵੇਗੀ।ਇਸ ਵਫ਼ਦ ਵਿੱਚ ਸੂਬੇ ਦੇ ਖਜ਼ਾਨਾ ਮੰਤਰੀ ਸ੍ਰੀ ਮਨਪ੍ਰੀਤ ਸਿੰਘ ਬਾਦਲ, ਸਿੰਚਾਈ ਤੇ ਬਿਜਲੀ ਮੰਤਰੀ ਸ੍ਰੀ ਰਾਣਾ ਗੁਰਜੀਤ ਸਿੰਘ, ਮੁੱਖ ਮੰਤਰੀ ਦੇ ਮੁੱਖ ਸਲਾਹਕਾਰ ਲੈਫਟੀਨੈਂਟ ਜਨਰਲ (ਸੇਵਾ-ਮੁਕਤ) ਤੇਜਿੰਦਰ ਸਿੰਘ ਸ਼ੇਰਗਿੱਲ, ਮੁੱਖ ਮੰਤਰੀ ਦੇ ਮੀਡੀਆ ਸਲਾਹਕਾਰ ਸ੍ਰੀ ਰਵੀਨ ਠੁਕਰਾਲ ਅਤੇ ਮੁੱਖ ਮੰਤਰੀ ਦੇ ਪ੍ਰਮੁੱਖ ਮੁੱਖ ਸਕੱਤਰ ਸ੍ਰੀ ਸੁਰੇਸ਼ ਕੁਮਾਰ ਤੋਂ ਇਲਾਵਾ ਮੁੱਖ ਮੰਤਰੀ ਦੇ ਸਿਆਸੀ ਸਕੱਤਰ ਸ੍ਰੀ ਕਰਨਪਾਲ ਸਿੰਘ ਸੇਖੋਂ, ਇਨਵੈਸਟ ਪੰਜਾਬ ਦੇ ਮੁਖੀ ਸ੍ਰੀ ਅਨੁਰਿਧ ਤਿਵਾੜੀ, ਪੰਜਾਬ ਬਿਊਰੋ ਆਫ ਇਨਵੈਸਟਮੈਂਠ ਪ੍ਰਮੋਸ਼ਨ ਦੇ ਸੀ.ਈ.ਓ. ਸ੍ਰੀ ਡੀ.ਕੇ. ਤਿਵਾੜੀ ਅਤੇ ਏ.ਸੀ.ਈ.ਓ. ਸ੍ਰੀਮਤੀ ਸ਼ਰੂਤੀ ਸਿੰਘ ਵੀ ਸ਼ਾਮਲ ਹਨ।ਇਕ ਸਰਕਾਰੀ ਬੁਲਾਰੇ ਨੇ ਦੱਸਿਆ ਕਿ ਇਹ ਵਫ਼ਦ ਸੂਬੇ ਵਿੱਚ ਨਿਵੇਸ਼ ਦੀਆਂ ਸੰਭਾਵਨਾਵਾਂ ਨੂੰ ਤਲਾਸ਼ਣ ਦੇ ਨਾਲ-ਨਾਲ ਸੂਬੇ ਦੀ ਆਰਥਿਕਤਾ ਤੇ ਸਨਅਤ ਨੂੰ ਹੁਲਾਰਾ ਦੇਣ ਲਈ ਲੋੜੀਂਦੀ ਭਾਈਵਾਲੀ ਦੀ ਸੰਭਾਵਨਾ ਵੀ ਘੋਖੇਗਾ।    ਆਈ.ਸੀ.ਆਈ.ਸੀ.ਆਈ. ਬੈਂਕ ਦੀ ਸੀ.ਈ.ਓ. ਸ੍ਰੀਮਤੀ ਚੰਦਾ ਕੋਛੜ, ਗੋਲਡਮੈਨ ਸੈਚ ਦੇ ਮੁਖੀ ਸੰਜੋਏ ਚੈਟਰਜੀ ਅਤੇ ਗੋਦਰੇਜ ਗਰੁੱਪ ਦੇ ਮੁਖੀ ਸ੍ਰੀ ਆਦੀ ਗੋਦਰੇਜ ਪ੍ਰਮੁੱਖ ਸਨਅਤਕਾਰ ਹਨ ਜਿਨ੍ਹਾਂ ਦੀ ਸੋਮਵਾਰ ਦੀ ਸ਼ਾਮ ਨੂੰ ਮੁੱਖ ਮੰਤਰੀ ਨੂੰ ਮਿਲਣ ਦੀ ਸੰਭਾਵਨਾ ਹੈ। ਇਸ ਉਪਰੰਤ ਕੇ.ਪੀ.ਐਮ.ਜੀ. ਇੰਡੀਆ ਦੇ ਮੁਖੀ ਤੇ ਸੀ.ਈ.ਓ. ਸ੍ਰੀ ਅਰੁਣ ਕੇ ਕੁਮਾਰ ਨਾਲ ਰਾਤ ਦੇ ਖਾਣੇ ‘ਤੇ ਮੀਟਿੰਗ ਹੋਵੇਗੀ।ਮੰਗਲਵਾਰ ਦੇ ਪ੍ਰੋਗਰਾਮ ਅਨੁਸਾਰ ਰਿਲਾਇੰਸ ਏ.ਡੀ.ਏ.ਜੀ. ਦੇ ਮੁਖੀ ਸ੍ਰੀ ਅਨਿਲ ਅੰਬਾਨੀ ਮੁੱਖ ਮੰਤਰੀ ਨੂੰ ਨਾਸ਼ਤੇ ਦੌਰਾਨ ਮਿਲਣਗੇ ਜਦਕਿ ਰਿਲਾਇੰਸ ਇੰਡਸਟਰੀਜ਼ ਦੇ ਮੁਖੀ ਸ੍ਰੀ ਮੁਕੇਸ਼ ਅੰਬਾਨੀ ਦੁਪਹਿਰ ਦੇ ਖਾਣੇ ਉਪਰੰਤ ਮੁੱਖ ਮੰਤਰੀ ਨੂੰ ਮਿਲਣਗੇ। ਦੁਪਹਿਰ ਦੇ ਖਾਣੇ ਤੋਂ ਪਹਿਲਾਂ ਮੁੱਖ ਮੰਤਰੀ ਆਰ.ਪੀ.ਜੀ. ਗਰੁੱਪ ਦੇ ਮੁਖੀ ਸ੍ਰੀ ਹਰਸ਼ ਗੋਇਨਕਾ, ਹਿੰਦੁਸਤਾਨ ਯੂਨੀਲਿਵਰ ਦੇ ਸੀ.ਈ.ਓ. ਤੇ ਐਮ.ਡੀ. ਸ੍ਰੀ ਸੰਜੀਵ ਮਹਿਤਾ ਅਤੇ ਮਹਿੰਦਰਾ ਐਂਡ ਮਹਿੰਦਰਾ ਲਿਮਟਡ ਦੇ ਚੇਅਰਮੈਨ ਸ੍ਰੀ ਆਨੰਦ ਮਹਿੰਦਰਾ ਨਾਲ ਵੱਖ-ਵੱਖ ਤੌਰ ‘ਤੇ ਮੀਟਿੰਗ ਕਰਨਗੇ।ਇਸੇ ਦੌਰਾਨ ਮੁੱਖ ਮੰਤਰੀ ਐਲ. ਐਂਡ ਟੀ. ਦੇ ਡਾਇਰੈਕਟਰ ਸ੍ਰੀ ਸ਼ੈਂਲੇਦਰ ਐਨ.ਰਾਏ ਅਤੇ ਹਿੰਦੂਜਾ ਗਰੁੱਪ ਦੇ ਚੇਅਰਮੈਨ ਸ੍ਰੀ ਅਸ਼ੋਕ ਪੀ ਹਿੰਦੂਜਾ ਨਾਲ ਵੀ ਮੀਟਿੰਗ ਕਰਨਗੇ।ਪ੍ਰੋਗਰਾਮ ਦੇ ਏਜੰਡੇ ਵਿੱਚ ਦੇਸ਼ ਦੇ ਦਵਾਈਆਂ ਦੇ ਨਿਰਮਾਤਾਵਾਂ ਦੀ ਸੰਸਥਾ, ਅਸ਼ੋਕਾ ਯੂਨੀਵਰਸਿਟੀ ਦੇ ਇਕ ਵਫ਼ਦ ਅਤੇ ਸਨਅਤਕਾਰਾਂ ਨਾਲ ਗੋਲ ਮੇਜ਼ ਮੀਟਿੰਗ ਵੀ ਸ਼ਾਮਲ ਹੈ।ਸਰਕਾਰੀ ਬੁਲਾਰੇ ਮੁਤਾਬਕ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਸੂਬੇ ਵਿੱਚ ਸਨਅਤੀ ਵਿਕਾਸ ਨੂੰ ਉਤਸ਼ਾਹਤ ਕਰਨ ਲਈ ਮੌਜੂਦਾ ਪ੍ਰਣਾਲੀ ਨੂੰ ਲੀਹ ‘ਤੇ ਲਿਆਉਣ ਵਾਸਤੇ ਵਚਨਬੱਧ ਹੈ ਤਾਂ ਜੋ ਸੂਬੇ ਵਿੱਚ ਸਨਅਤੀਕਰਨ ਨੂੰ ਬਿਨਾਂ ਕਿਸੇ ਰੁਕਾਵਟ ਦੇ ਉਤਸ਼ਾਹਤ ਕਰਨ ਦੇ ਨਾਲ-ਨਾਲ ਸੂਬੇ ਦੇ ਸਨਅਤ ਪੱਖੀ ਮਾਹੌਲ ਵਿੱਚ ਨਿਵੇਸ਼ ਨੂੰ ਹੁਲਾਰਾ ਦਿੱਤਾ ਜਾ ਸਕੇ।

WRITTEN BY